Улаанбаатар /МОНЦАМЭ/. Согтууруулах ундаа хэрэглэсэн үедээ замын хөдөлгөөнд оролцсон 78 жолоочийг илрүүлэв. Үүнээс дурдвал, энэ амралтын өдөр нийслэлийн Хан-Уул дүүргийн нэгдүгээр хорооны 14 дүгээр байрны ойролцоох замд улсын дугаар нь тодорхойгүй автомашины жолооч явган зорчигч М-ийг мөргөж, ослын газрыг орхиж явсан байна. Тус хэргийг тээврийн цагдаагийн албаны эрүүгийн хэлтсийн алба хаагч шуурхай эрэн сурвалжилж, жолоочийг согтууруулах ундаа хэрэглэсэн үедээ үйлдсэн болохыг тогтоожээ.

 

 

Түүнчлэн нийслэлийн Баянзүрх дүүргийн 11 дүгээр хорооны “Хонхор”-ын замд “Toyota prius” маркийн 2 автомашин мөргөлдөж, согтуугаар тээврийн хэрэгсэл жолоодсон Ц гэмтсэн байна. Иймд тээврийн цагдаагийн албанаас согтууруулах ундааны зүйл хэрэглэсэн үедээ тээврийн хэрэгсэл жолоодохгүй байхыг анхааруулж байна. Мөн дээрх хэрэгт хуулийн дагуу шийтгэл оногдуулжээ. Ташрамд дурдахад, Зөрчлийн тухай хуулийн 14.7.38 зүйлийн дагуу тээврийн хэрэгслээр замын хөдөлгөөнд оролцож уулзвар, явган хүний гарц нэвтрэх үед давуу эрхтэй явган зорчигчид зам тавьж өгөөгүй 95 жолоочийг тус бүр хорин нэгжтэй тэнцэх хэмжээний төгрөгөөр торгосон байна.